நெல்லை, ஆக. 14: தொழில்நுட்பம் நம் வாழ்க்கையை எளிதாக்கியிருக்கிறது என்பதில் மாற்றுக் கருத்தில்லை. ஆனால், அதே தொழில்நுட்பம் இன்று நம் உழைப்பைச் சுரண்டும் ஒரு கண்ணுக்குத் தெரியாத ஆயுதமாகவும் மாறியுள்ளது. இதற்குச் சான்றாக, திருநெல்வேலி மற்றும் தென்காசி மாவட்டங்களில் மிகக்குறுகிய காலத்தில் நடந்த 4 முக்கிய ஆன்லைன் கொள்ளைகள் நம்மை அதிர வைக்கின்றன. வயது, படிப்பு, பதவி என எதையும் பாராமல், டிஜிட்டல் கொள்ளையர்கள் தங்கள் வலையை மிகத் துல்லியமாக விரித்துள்ளனர். ஒரே நேரத்தில் 4 பேரிடம் சுமார் ரூ.8 லட்சம் சுருட்டப்பட்டுள்ளது.

தென்காசி மாவட்டம் மேலகரம் பகுதியைச் சேர்ந்தவர் சுப்பிரமணியன் (56). இவர் திருநெல்வேலியில் உள்ள ஒரு ஓட்டலில் தொழிலாளியாகப் பணியாற்றி வருகிறார். பேஸ்புக்கில் வந்த உலர் பழங்கள் தொடர்பான விளம்பரத்தைப் பார்த்து தொடர்பு கொண்ட சுப்பிரமணியனுக்கு, வாட்ஸ்அப் வழியாக ஒரு லிங்க் அனுப்பப்பட்டது. அதன் மூலம் ஒரு ஏபிகே பைலை இன்ஸ்டால் செய்ய மோசடி கும்பல் வலியுறுத்தியது. ஏபிகே என்பது அதிகாரப்பூர்வ ப்ளே ஸ்டோர் பாதுகாப்பு வளையத்திற்கு வெளியே இருக்கும் ஒரு செயலி. இதை இன்ஸ்டால் செய்தவுடன், மொபைல் போனின் முழு கட்டுப்பாடும் ஹேக்கர்களின் கைக்குச் சென்றுவிடும். அந்தச் செயலியைப் பதிவிறக்கிய சில நிமிடங்களிலேயே, அவரது மொபைலை தங்கள் கைக்குள் கொண்டு வந்த கும்பல், அவரது வங்கி கணக்கிலிருந்து ரூ.1 லட்சத்து 69 ஆயிரத்து 998ஐ அபேஸ் செய்தது. ஒரு சாதாரண உலர் பழங்கள் ஆர்டர், அவரது மொத்தச் சேமிப்பையும் காலி செய்துவிட்டது.

தென்காசி மாவட்டம் சுந்தரபாண்டியபுரத்தைச் சேர்ந்த விவசாயியான இசக்கிமுத்து (35), ஒரு சிவில் இன்ஜினியரிங் பட்டதாரி. ஒரு மர்மப் பெண் இவரைத் தொலைபேசியில் அழைத்து, பங்குச்சந்தையில் முதலீடு செய்தால் பல மடங்கு லாபம் ஈட்டலாம் என ஆசை வார்த்தை கூறியுள்ளார். அந்தப் பெண் கொடுத்த ஆசை வார்த்தைகளை நம்பிய இசக்கிமுத்து, அவர் சொன்ன போலியான வங்கிக் கணக்குகளுக்குப் பல தவணைகளாகப் பணம் அனுப்பியுள்ளார். இன்ஜினியரிங் பட்டதாரியாக இருந்தும் அதிக லாபம் என்ற வார்த்தை அவரது பகுத்தறிவை மறைத்துவிட்டது. இதன் விளைவாக அவர் ரூ.1 லட்சத்து 77 ஆயிரம் பணத்தை இழந்தார்.

திருநெல்வேலி மாவட்டம் அனந்தகிருஷ்ணாபுரத்தைச் சேர்ந்த தர்பூசணி வியாபாரி சந்திரகுமார் (38), பேஸ்புக்கில் கிரிப்டோ கரன்சி மூலம் லட்சாதிபதி ஆகலாம் என்ற விளம்பரத்தைப் பார்த்துத் தனது விவரங்களைப் பதிவு செய்துள்ளார். வாட்ஸ்அப் கால் மூலம் பேசிய மர்ம நபர்கள், தங்கள் நிறுவனத்தின் ஆப் மூலம் சிறிய தொகையை முதலீடு செய்தால் தினமும் மிகப்பெரிய லாபம் பார்க்கலாம் என்று மூளைச்சலவை செய்துள்ளனர். கிரிப்டோ பற்றித் தெரியாதவர்களைக் குறிவைப்பதே இந்தக் கும்பலின் வேலை. கூகுள் பே மூலம் பணத்தைப் பரிமாறச் சொல்லி, மொத்தமாக ரூ.1 லட்சத்து 28 ஆயிரத்து 950ஐ சுருட்டிக்கொண்டு அந்த கும்பல் மாயமானது.

நெல்லை மாவட்டம் செட்டிகுளத்தைச் சேர்ந்த சுந்தரமகாலிங்கம் (44), கூடங்குளம் அணுமின் நிலையத்தில் தொழில்நுட்பவியலாளராகப் பணியாற்றி வருகிறார். பாதுகாப்பு மற்றும் தொழில்நுட்பம் குறித்து நன்கு அறிந்த இவரையே மோசடி கும்பல் வீழ்த்தியுள்ளது. இவரை ஒரு வாட்ஸ்அப் குழுவில் இணைத்த மோசடி நபர்கள், பங்குச்சந்தை முதலீடு என்ற பெயரில் ஒரு நூதன செயலியைப் பதிவிறக்கம் செய்ய வைத்தனர். அந்தச் செயலி மூலம் இவரது தனிப்பட்ட விவரங்களைத் தந்திரமாகப் பெற்று, அடுத்தடுத்து பல தவணைகளாக ரூ.3 லட்சத்தைச் சுருட்டியுள்ளனர். கூடங்குளம் போன்ற உயர் பாதுகாப்பு கொண்ட இடத்தில் வேலை செய்யும் ஒரு தொழில்நுட்ப வல்லுநரையே ஒரு போலியான செயலியால் ஏமாற்ற முடிகிறது என்றால், சாதாரண மக்களின் நிலை என்ன? ஒவ்வொரு கிளிக்கிலும் எச்சரிக்கை அவசியம்.

நெல்லை மற்றும் தென்காசியில் ஒரே நேரத்தில் 4 பேரிடம் மொத்தம் ரூ.7 லட்சத்து 75 ஆயிரத்து 948 அபேஸ் செய்யப்பட்டுள்ளது. இந்த டிஜிட்டல் வேட்டையைப் பற்றி நெல்லை மற்றும் தென்காசி மாவட்ட சைபர் கிரைம் போலீசார் தீவிரமாக விசாரித்து வருகின்றனர்.