இந்த பதிவு உச்ச நீதிமன்றம் நேற்று மாஞ்சோலை விவகாரம் தொடர்பாக வெளியிட்ட உத்தரவின் அடிப்படையிலானது. அந்த உத்தரவின் சாரம்சம் அனைவரையும் சென்றடையும் நோக்கில் எழுதியது. இந்த உத்தரவு தமிழகத்தின் வனங்களுக்கும், வனத்தை நம்பி வாழும் மக்களுக்கும் கிடைத்திருக்கும் ஒரு பெரிய நம்பிக்கை வெளிச்சம், அதே நேரத்தில் வனத்திற்குள் குடிபெயர்வுகளை இனி அனுமதிக்காது என்றே தோன்றுகிறது.
மாஞ்சோலை விவகாரத்தை எப்படி அணுகுவது என்பது எனக்கு தெரியவில்லை. காரணம் பல தலைமுறைகளாக அங்கிருந்த தோட்டத்தொழிலாளர்களின் வாழ்வோடு காடும் பிணைந்துள்ளது. இப்போது அவர்களது பிறந்த மண் அவர்களது நினைவில் மட்டுமே உள்ளது.
நீதிபதி மேத்தா அவர்களின் தலைமையிலான அமர்வு, காடுகளை நம்முடைய சுற்றுச்சூழல் அமைப்பின் நுரையீரல் என்று உருவகப்படுத்தி இருக்கிறது. உண்மையில், காடுகள் இல்லையென்றால் நாம் சுவாசிக்கவே முடியாது என்ற அடிப்படை உண்மையை நீதிமன்றம் அழுத்தமாக பதிவு செய்திருக்கிறது. மற்ற நாடுகளை ஒப்பிடும்போது இந்தியாவில் வனப்பகுதியின் அளவு குறைந்து வருவது கவலை அளிக்கிறது என்ற நீதிமன்றத்தின் ஆதங்கம் நம்மையும் யோசிக்க வைக்கிறது.
வரலாற்றை புரட்டிப் பார்த்தால், சிங்கம்பட்டி ஜமீன் காடுகள் ஒரு காலத்தில் தனியாருக்கு குத்தகைக்கு விடப்பட்டிருந்ததும், அங்கு தேயிலை பயிரிடப்பட்டதும் காலப்போக்கில் இப்பகுதி பாதுகாக்கப்பட்ட வனமாக அறிவிக்கப்பட்டதும் ஒரு நீண்ட நெடிய பயணம். இறுதியில் 2018ல் களக்காடு - முண்டந்துறை புலிகள் காப்பகத்தின் ஒரு பகுதியாக மாறியது. ஆனால், இந்த மாற்றத்தை எதிர்த்து தொடரப்பட்ட வழக்குகளும், மாஞ்சோலை தொழிலாளர்களின் வாழ்வாதாரத்திற்கான போராட்டங்களும் பல ஆண்டுகளாக தொடர்ந்துகொண்டே இருந்தன.
இந்த சூழலில், உச்ச நீதிமன்றம் இந்த விவகாரத்தை கையில் எடுத்திருப்பது ஒரு முக்கியமான திருப்பம். மத்திய அரசும் வனப்பகுதிகளை பாதுகாக்க உறுதியளித்து உள்ளது. அரசு தரப்பில் உச்ச நீதிமன்ற வக்கீல் பரமேஸ்வர் இந்த பகுதியின் முக்கியத்துவத்தை எடுத்துரைத்ததுடன், அங்குள்ள சட்டவிரோத ஆக்கிரமிப்புகள் குறித்தும் கவலை தெரிவித்தது கவனிக்கத்தக்கது. மேற்கு தொடர்ச்சி மலையின் ஒரு பகுதியான அகத்தியமலை உயிர்க்கோள காப்பகத்தை மீட்டெடுப்பது எவ்வளவு முக்கியம் என்பதை அவரது வாதம் உணர்த்துகிறது.
உச்ச நீதிமன்றம் உடனடியாக களத்தில் இறங்கி மத்திய அதிகாரமளிக்கப்பட்ட குழுவை (சிஇசி) அதாவது மத்திய அரசை முழு அகத்தியமலைப் பகுதியையும் ஆய்வு செய்ய உத்தரவிட்டிருப்பது மிகவும் சரியான நடவடிக்கை. புலிகள் காப்பகம் மட்டுமல்லாது, ஸ்ரீவில்லிபுத்தூர் கிரிஸ்ல்டு அணில் சரணாலயம், மேகமலை, திருநெல்வேலி வனவிலங்கு சரணாலயம் என அனைத்து பகுதிகளிலும் என்ன நடக்கிறது என்பதை சிஇசி விரிவாக ஆராயப் போகிறது. செயற்கைக்கோள் படங்கள் மற்றும் அதிநவீன தொழில்நுட்பங்களை பயன்படுத்த நீதிமன்றம் அறிவுறுத்தியிருப்பது ஆய்வின் துல்லியத்தை அதிகரிக்கும். இந்த ஆய்வுக்கு மாநில அரசும், மாவட்ட நிர்வாகமும், காவல்துறையும் முழு ஒத்துழைப்பு கொடுக்க வேண்டும் என்ற நீதிமன்றத்தின் கட்டளை மிகவும் முக்கியமானது.
வனங்களை பாதுகாப்பதற்கான இந்த அதிரடி நடவடிக்கையை நாம் வரவேற்க வேண்டும்.
அதே நேரத்தில், பல தலைமுறைகளாக வனத்தை நம்பி வாழும் மாஞ்சோலை தேயிலை தோட்ட தொழிலாளர்களின் மறுவாழ்வு பற்றியும் நீதிமன்றம் அக்கறை காட்டியிருப்பது மனிதாபிமானமிக்க செயல். அவர்களின் பிரச்சனைகளை ஏப்ரல் 22ம் தேதி தனியாக விசாரிக்க நீதிமன்றம் உத்தரவிட்டுள்ளதால், அவர்களது வாழ்வில் ஒரு விடியல் பிறக்கலாம் என்று நாம் நம்புவோம். ஒட்டுமொத்தமாக, இந்த உத்தரவு தமிழகத்தின் சுற்றுச்சூழல் பாதுகாப்பிற்கும், அங்கு வாழும் மக்களின் நலனுக்கும் ஒரு முக்கியமான மைல்கல்லாக இருக்கும் என்பதில் எந்த சந்தேகமும் இல்லை.
